У свеце дабрыні

 8 кастрычніка ў філіяле ”Вярхоўская сельская бібліятэка“ адбылася літаратурная вечарына ”У свеце дабрыні“, прысвечаная дню нараджэння знакамітай беларускай паэтэсы Эдзі Агняцвет.
 Эдзі Сямёнаўну часта называюць беларускай Агніяй Барто. Яна пакінула пасля сябе багатую спадчыну: больш за дваццаць кніг вершаў, паэм, казак, скорагаворак і жартаў для маленькіх чытачоў. Яе творчасць — гэта цэлая ”Краіна маленства“, напоўненая шчырасцю і цеплынёй. Нават свой псеўданім паэтэса абрала невыпадкова, бо была чалавекам з незвычайнай, сонечнай душой.
 Каб бліжэй пазнаёміць гасцей з жыццёвым і творчым шляхам аўтара, бібліятэкар падрыхтавала мультымедыйную прэзентацыю. Прысутныя даведаліся пра дзяцінства Эдзі Агняцвет, яе навучанне, працу і галоўныя вехі станаўлення як майстра слова.
 Адметнай часткай сустрэчы стала паэтычная хвілінка. Школьнікі не проста слухалі, але і самі актыўна ўдзельнічалі ў чытанні вершаў. Са сцэны гучалі як любімыя дзіцячыя творы (”Рэчка, рэчанька мая“, ”Мама“, ”Выхавацель“), так і глыбокая лірыка, прысвечаная Радзіме, прыродзе і вечным чалавечым каштоўнасцям. Сярод удзельнікаў нават разгарнуўся конкурс на лепшага дэкламатара.
 Паколькі многія вершы Эдзі Агняцвет сталі песнямі дзякуючы беларускім кампазітарам, мерапрыемства суправаджалася музычнымі запісамі. Яркім дапаўненнем вечарыны стала тэматычная кніжная выстава ”Краіна маленства“.
 Сустрэча прайшла ў вельмі цёплай, душэўнай і творчай атмасферы. Яна не толькі падарыла выдатны настрой, але і дапамагла кожнаму прысутнаму глыбей адчуць непаўторную прыгажосць і мілагучнасць беларускага слова.