Вярхоўcкія выкрутасы, або як Несцерка бульбай частаваў

 Тэатралізаванае свята бульбы ”Вярхоўcкія выкрутасы, або як Несцерка бульбай частаваў“ прайшло 19 верасня ў аграгарадку Вярхоўе. Яркае і вясёлае мерапрыемства сумеснымі намаганнямі падрыхтавалі і правялі бібліятэкар Вярхоўскай сельскай бібліятэкі і працаўнікі мясцовага сельскага дома культуры.

  Гаспадыні Ганна ды Марыля разам з народным жартаўніком Несцеркам адкрылі свята, распавялі гісторыю з'яўлення бульбы на Беларусі і патлумачылі, чаму яе лічаць ”другім хлебам“.

 Свята пакінула шмат станоўчых водгукаў у жыхароў аграгарадка дзякуючы разнастайнай праграме і тэматычным лаўкам:

• ”Аграрная выстава“: Госці знаёміліся з рознымі гатункамі бульбы і багатым ураджаем з садоў і агародаў, а таксама атрымалі незвычайны «Бульбяны гараскоп».
• ”Рамесны куток“: Тут былі прадстаўлены вырабы вярхоўскіх майстроў, у тым ліку плеценыя кошыкі розных часоў.
• ”Бульба-шоў“ і дэгустацыя: Наведвальнікі каштавалі нацыянальныя стравы (дранікі, бабку, зразы, бульбішнікі) і ўдзельнічалі ў конкурсе ”Бульбяны дэгустатар“, адгадваючы стравы на смак з завязанымі вачыма.
• ”Бульба-батл“: Пляцоўка для рухомых гульняў і конкурсаў (”Бульбяны спрынт“, ”Трапны бульбаш“, ”Збор ураджая“). Пераможца спрынту атрымаў ганаровае званне ”Галоўнага агранома Вярхоўскага сельсавета“.
• ”Сыты беларус“: Кулінарны рай з майстар-класам, дзе традыцыйныя беларускія дранікі гатаваліся на ”жывым агні“ і адразу падаваліся гасцям.

  Культурную праграму дапоўнілі вершы, гумарэскі і народныя песні, а бібліятэкар арганізавала тэматычныя кніжныя выставы: ”Усё пра бульбу“ і ”Час ствараць: кнігі, што натхняюць на творчасць“. Фіналам свята стаў шчодры пачастунак і захапляльная гульня ў ”бульбяныя шашкі“ для дзяцей.